rind-e-be-maya ki ye mai-talabi ai saqi

rind-e-be-māya kī ye mai-talabī ai saaqī

bech Daalī hai garāñ-qadr ḳhudī ai saaqī

ham-navā gardish-e-ayyām huī jaatī hai

uff ye dīvānoñ kī āshufta-sarī ai saaqī

phūñk Daalā jabal-e-tūr kā zarra zarra

husn aur husn kī ye jalva-garī ai saaqī

pesh-dastī mire aa.iin se bāhar hai to ho

mujh se dekhī na ga.ī tishna-labī ai saaqī

qāfile hadd-e-tavahhum meñ bhaTakte haiñ abhī

rahnumāoñ kī ye be-rāh-ravī ai saaqī

ik tabassum pe hai gulshan kī hayāt-e-abadī

qābil-e-dīd hai ġhunchoñ kī hañsī ai saaqī

ik na.ī sub.h ke jalvoñ ne bikherīñ kirneñ

gum huī jaatī hai ab tīra-shabī ai saaqī

rind-e-be-maya ki ye mai-talabi ai saqi

bech Dali hai garan-qadr KHudi ai saqi

ham-nawa gardish-e-ayyam hui jati hai

uff ye diwanon ki aashufta-sari ai saqi

phunk Dala jabal-e-tur ka zarra zarra

husn aur husn ki ye jalwa-gari ai saqi

pesh-dasti mere aain se bahar hai to ho

mujh se dekhi na gai tishna-labi ai saqi

qafile hadd-e-tawahhum mein bhaTakte hain abhi

rahnumaon ki ye be-rah-rawi ai saqi

ek tabassum pe hai gulshan ki hayat-e-abadi

qabil-e-did hai ghunchon ki hansi ai saqi

ek nai subh ke jalwon ne bikherin kirnen

gum hui jati hai ab tira-shabi ai saqi