ungliyan mujh pe jo sarkar uTha dete ho

uñgliyāñ mujh pe jo sarkār uThā dete ho

aur behtar mirā kirdār banā dete ho

jaam meñ zahr ko chupke se milāne vaalo

'umr lambī ho mirī ye bhī du'ā dete ho

aa.ina tum ko dikhāne kī kare jo koshish

tum bhī us par koī ilzām lagā dete ho

rāstoñ par mire kāñToñ ko bichhāne vaalo

tum mire paaoñ kī raftār baḌhā dete ho

ghoT dete ho galā pahle mirī chāhat kā

aur phir mujh ko hasīñ ḳhvāb dikhā dete ho

zindagī jiine ke ādāb huā karte haiñ

bā-adab ho ke bhī ye baat bhulā dete ho

aap se us ko ziyāda hai shikāyat 'rūbī'

aap jis par ye dil-o-jān luTā dete ho

ungliyan mujh pe jo sarkar uTha dete ho

aur behtar mera kirdar bana dete ho

jam mein zahr ko chupke se milane walo

'umr lambi ho meri ye bhi du'a dete ho

aaina tum ko dikhane ki kare jo koshish

tum bhi us par koi ilzam laga dete ho

raston par mere kanTon ko bichhane walo

tum mere paon ki raftar baDha dete ho

ghoT dete ho gala pahle meri chahat ka

aur phir mujh ko hasin KHwab dikha dete ho

zindagi jine ke aadab hua karte hain

ba-adab ho ke bhi ye baat bhula dete ho

aap se us ko ziyaada hai shikayat 'rubi'

aap jis par ye dil-o-jaan luTa dete ho