husn-e-KHuddar pe ghaza hai KHud-arai ka

husn-e-ḳhuddār pe ġhāza hai ḳhud-ārā.ī kā

dekheñ jin jin ko bhī dā'vā hai shakebā.ī kā

'ishq phir 'ishq bhī aise but-e-harjā.ī kā

jis pe saaya na paḌā gosha-e-tanhā.ī kā

sharm kyā ḳhauf bhī hai dīda-varoñ se un ko

aur phir shauq bhī hai anjuman-ārā.ī kā

mahfil-e-nāz meñ tum yuuñ hī raho jalva-fagan

chāhe jo haal bhī ho jaa.e tamāshā.ī kā

jurm-e-taḳhlīq-e-tamannā se rahe vo to barī

naam rusvā huā mā'sūm tamannā.ī kā

merī is fitrat-e-īzā-talabī se pahle

thā kahāñ un ko salīqa sitam-ārā.ī kā

tum se phir bhī mirī vahshat kā mudāvā na huā

tum ne dekhā hai tamāshā mirī rusvā.ī kā

ḳhanda-zan hai mire ahvāl-e-pareshāñ pe vo shoḳh

kitnā qātil hai ye andāz masīhā.ī kā

sham'-e-dair-o-haram-o-shams-o-qamar gul kar do

jab añdherā ho muqaddar mirī bīnā.ī kā

sab kaheñ anfus-o-āfāq kā 'ālam jis ko

ek gosha hai mirī 'ālam-e-tanhā.ī kā

josh-e-mai mauj-e-havā tund o talātum goyā

silsila hai kisī machlī huī añgḌā.ī kā

vo ḳhirāmāñ haiñ gulistāñ meñ ba-andāz-bahār

dekh 'tābāñ' yahī mauqa' hai pazīrā.ī kā

husn-e-KHuddar pe ghaza hai KHud-arai ka

dekhen jin jin ko bhi da'wa hai shakebai ka

'ishq phir 'ishq bhi aise but-e-harjai ka

jis pe saya na paDa gosha-e-tanhai ka

sharm kya KHauf bhi hai dida-waron se un ko

aur phir shauq bhi hai anjuman-arai ka

mahfil-e-naz mein tum yun hi raho jalwa-fagan

chahe jo haal bhi ho jae tamashai ka

jurm-e-taKHliq-e-tamanna se rahe wo to bari

nam ruswa hua ma'sum tamannai ka

meri is fitrat-e-iza-talabi se pahle

tha kahan un ko saliqa sitam-arai ka

tum se phir bhi meri wahshat ka mudawa na hua

tum ne dekha hai tamasha meri ruswai ka

KHanda-zan hai mere ahwal-e-pareshan pe wo shoKH

kitna qatil hai ye andaz masihai ka

sham'-e-dair-o-haram-o-shams-o-qamar gul kar do

jab andhera ho muqaddar meri binai ka

sab kahen anfus-o-afaq ka 'alam jis ko

ek gosha hai meri 'alam-e-tanhai ka

josh-e-mai mauj-e-hawa tund o talatum goya

silsila hai kisi machli hui angDai ka

wo KHiraman hain gulistan mein ba-andaz-bahaar

dekh 'taban' yahi mauqa' hai pazirai ka