ana se jang thi ghairat ko marta kaise

anā se jang thī ġhairat ko mārtā kaise

maiñ apne aap se laḌtā to hārtā kaise

tumhāre ek nahīñ ne bachā liyā varna

tumhāre pyaar kā ehsāñ utārtā kaise

balā kā shor thā āvāz dab ke rah jaatī

pukārtā bhī tumheñ to pukārtā kaise

zamīñ se haath falak tak nahīñ gayā merā

tumheñ gumān se nīche utārtā kaise

vo soch maar dī jo muttafiq na thī tujh se

ye muttaqī tirī ḳhvāhish ko mārtā kaise

tirī nazar kā agar aa.ina nahīñ hotā

maiñ apne aap ko us meñ sañvārtā kaise

so maiñ ne maar diyā dhīre dhīre ḳhud ko hī

tire binā maiñ ye jīvan guzārtā kaise

nahīñ Dubotā zamāna agar mujhe 'āsif'

musībatoñ se maiñ ḳhud ko ubhārtā kaise

ana se jang thi ghairat ko marta kaise

main apne aap se laDta to haarta kaise

tumhaare ek nahin ne bacha liya warna

tumhaare pyar ka ehsan utarta kaise

bala ka shor tha aawaz dab ke rah jati

pukarta bhi tumhein to pukarta kaise

zamin se hath falak tak nahin gaya mera

tumhein guman se niche utarta kaise

wo soch mar di jo muttafiq na thi tujh se

ye muttaqi teri KHwahish ko marta kaise

teri nazar ka agar aaina nahin hota

main apne aap ko us mein sanwarta kaise

so main ne mar diya dhire dhire KHud ko hi

tere bina main ye jiwan guzarta kaise

nahin Dubota zamana agar mujhe 'asif'

musibaton se main KHud ko ubhaarta kaise