tera ata kiya hua shuur umr bhar raha

tirā 'atā kiyā huā shu'ūr 'umr bhar rahā

piyā to ek jaam thā surūr 'umr bhar rahā

tire hī naam par jiyā tire hī naam par marā

tirī sharāb ke nashe meñ chuur 'umr bhar rahā

ba-sad-adab ba-har-nafas hai terā shukr ai ḳhudā

ki mujh pe tere faiz kā vafūr 'umr bhar rahā

usī kī barkatoñ se hādse na paas aa sake

zabāñ pe naam aap kā huzūr 'umr bhar rahā

luTe hue navāb-zādoñ kā bharam bhī ḳhuub thā

riyāsateñ ujaḌ ga.iiñ ġhurūr 'umr bhar rahā

vo ik vafā-shi'ār thā hamīñ se us ko pyaar thā

na jaane kyuuñ ye zehn meñ futūr 'umr bhar rahā

kisī se zikr tak nahīñ kiyā ġhamoñ kā tā-hayāt

mirā mizāj thā yahī ġhayūr 'umr bhar rahā

nazar meñ ahl-e-fan kī jo rivāyateñ fuzūl thiiñ

zafar bhī un rivāyatoñ se duur 'umr bhar rahā

tera 'ata kiya hua shu'ur 'umr bhar raha

piya to ek jam tha surur 'umr bhar raha

tere hi nam par jiya tere hi nam par mara

teri sharab ke nashe mein chur 'umr bhar raha

ba-sad-adab ba-har-nafas hai tera shukr ai KHuda

ki mujh pe tere faiz ka wafur 'umr bhar raha

usi ki barkaton se hadse na pas aa sake

zaban pe nam aap ka huzur 'umr bhar raha

luTe hue nawab-zadon ka bharam bhi KHub tha

riyasaten ujaD gain ghurur 'umr bhar raha

wo ek wafa-shi'ar tha hamin se us ko pyar tha

na jaane kyun ye zehn mein futur 'umr bhar raha

kisi se zikr tak nahin kiya ghamon ka ta-hayat

mera mizaj tha yahi ghayur 'umr bhar raha

nazar mein ahl-e-fan ki jo riwayaten fuzul thin

zafar bhi un riwayaton se dur 'umr bhar raha