KHayal-e-ghair kahin nuqs-e-bandagi to nahin

ḳhayāl-e-ġhair kahīñ nuqs-e-bandagī to nahīñ

ḳhudā ke qurb meñ haa.il tirī ḳhudī to nahīñ

vafā hañsī to nahīñ 'ishq dil-lagī to nahīñ

janāb-e-dil tumheñ zebā ye sādgī to nahīñ

ḳhushī ḳhushī tire ġham sah liyā hī kartā huuñ

agarche ġham hai bahar-hāl ġham ḳhushī to nahīñ

tarah tarah ke masā.ib diye haiñ duniyā ne

ġham-e-hayāt hī duniyā-e-zindagī to nahīñ

mujhe ye Dar hai shab-e-ġham na mustaqil ho jaa.e

ye jāntā huuñ ki ye raat āḳhrī to nahīñ

jabīn-e-nāz pe paḌtī hai kyuuñ shikan pe shikan

mirī nazar tire jalvoñ ko aarsī to nahīñ

abhī jamāl-e-haqīqat hai so hijāboñ meñ

ye rang-o-nūr ke jalve hī dīdanī to nahīñ

dhaḌaktā dil bhī hai shāmil ḳhayāl-e-yār ke saath

nafas kī āmad-o-shud hī pe zindagī to nahīñ

laboñ pe aah na āñkhoñ meñ ashk hī 'tābāñ'

ye zindagī sī koī shai hai zindagī to nahīñ

KHayal-e-ghair kahin nuqs-e-bandagi to nahin

KHuda ke qurb mein hail teri KHudi to nahin

wafa hansi to nahin 'ishq dil-lagi to nahin

janab-e-dil tumhein zeba ye sadgi to nahin

KHushi KHushi tere gham sah liya hi karta hun

agarche gham hai bahar-haal gham KHushi to nahin

tarah tarah ke masaib diye hain duniya ne

gham-e-hayat hi duniya-e-zindagi to nahin

mujhe ye Dar hai shab-e-gham na mustaqil ho jae

ye jaanta hun ki ye raat aaKHri to nahin

jabin-e-naz pe paDti hai kyun shikan pe shikan

meri nazar tere jalwon ko aarsi to nahin

abhi jamal-e-haqiqat hai so hijabon mein

ye rang-o-nur ke jalwe hi didani to nahin

dhaDakta dil bhi hai shamil KHayal-e-yar ke sath

nafas ki aamad-o-shud hi pe zindagi to nahin

labon pe aah na aankhon mein ashk hi 'taban'

ye zindagi si koi shai hai zindagi to nahin