dil un se jo manga to pasheman hue hum

dil un se jo māñgā to pashemān hue ham

nādān the nādān the nādān hue ham

ham tujh ko dikhā dete ḳhudā.ī kā tamāsha

sau bātoñ kī ik baat ki insān hue ham

jab se tirī chaukhaT pe jhukāyā hai jabīñ ko

ham rind bane mastī-e-'irfān hue ham

har chehre meñ aatā hai nazar apnā hī chehra

ḳhud aa.ina ḳhud dīda-e-hairān hue ham

yuuñ dil meñ liye phirte haiñ tasvīr tumhārī

jaise kisī kā'be ke nigahbān hue ham

vā'da hai mulāqāt kā ab aanā paḌegā

ai jaan tirī yaad meñ be-jān hue ham

is parda-e-hastī ko kiyā chaak to dekhā

insān kahāñ maz.har-e-yazdān hue ham

pahchān ga.e tujh ko zuleḳhā-e-zamāna

bad-nām hue yūsuf-e-kan’ān hue ham

ik but kī parastish meñ khulā raaz ye 'vāsif'

kāfir jo hue hāfiz-e-qur.ān hue ham

dil un se jo manga to pasheman hue hum

nadan the nadan the nadan hue hum

hum tujh ko dikha dete KHudai ka tamasha

sau baaton ki ek baat ki insan hue hum

jab se teri chaukhaT pe jhukaya hai jabin ko

hum rind bane masti-e-'irfan hue hum

har chehre mein aata hai nazar apna hi chehra

KHud aaina KHud dida-e-hairan hue hum

yun dil mein liye phirte hain taswir tumhaari

jaise kisi ka'be ke nigahban hue hum

wa'da hai mulaqat ka ab aana paDega

ai jaan teri yaad mein be-jaan hue hum

is parda-e-hasti ko kiya chaak to dekha

insan kahan mazhar-e-yazdan hue hum

pahchan gae tujh ko zuleKHa-e-zamana

bad-nam hue yusuf-e-kan’an hue hum

ek but ki parastish mein khula raaz ye 'wasif'

kafir jo hue hafiz-e-quran hue hum