batane ke liye duniya ke raaz logon ko

batāne ke liye duniyā ke raaz logoñ ko

ḳhudā ne bhejā hai ham be-niyāz logoñ ko

jo aap apne habīb-o-ḳhalīl rakhtā ho

vo kyuuñ rakhegā mohabbat se baaz logoñ ko

to ye zamāne se ḳhud kyuuñ nahīñ ulajh paḌte

faqīr par hai agar e'tirāz logoñ ko

maiñ chāhtā huuñ ravayyoñ pe baat ho lekin

rahā nahīñ hai kisī kā lihāz logoñ ko

khulā ki vaqt se tanhā thā barsar-e-paikār

khaTak rahā thā jo dast-e-darāz logoñ ko

ye maiñ ne pesh kiyā ḳhud ko az-rah-e-tanqīd

ye maiñ ne khol diyā hai mahāz logoñ ko

maqām apnā banāne ke vāste 'hāris'

diyā hai us ne hamārā javāz logoñ ko

batane ke liye duniya ke raaz logon ko

KHuda ne bheja hai hum be-niyaz logon ko

jo aap apne habib-o-KHalil rakhta ho

wo kyun rakhega mohabbat se baz logon ko

to ye zamane se KHud kyun nahin ulajh paDte

faqir par hai agar e'tiraaz logon ko

main chahta hun rawayyon pe baat ho lekin

raha nahin hai kisi ka lihaz logon ko

khula ki waqt se tanha tha barsar-e-paikar

khaTak raha tha jo dast-e-daraaz logon ko

ye main ne pesh kiya KHud ko az-rah-e-tanqid

ye main ne khol diya hai mahaz logon ko

maqam apna banane ke waste 'haaris'

diya hai us ne hamara jawaz logon ko