jo suna tha suna diya maine

jo sunā thā sunā diyā maiñ ne

yā'nī sab kuchh batā diyā maiñ ne

jis ko dekhā gayā thā sub.h-e-azal

us kā jalva dikhā diyā maiñ ne

bijliyoñ ko machalte jab dekhā

āshiyāñ ḳhud jalā diyā maiñ ne

maiñ ne har-sū tumhārā ġham paayā

yuuñ tirā ġham bhulā diyā maiñ ne

tere ashkoñ kī baat kyā kahiye

har qadam ḳhuuñ bahā diyā maiñ ne

sang-e-dar ḳhud taḌap ke aa pohñchā

yūñhī sar ko jhukā diyā maiñ ne

rāz-e-taslīm jab khulā 'vāsif'

naqsh-e-hastī miTā diyā maiñ ne

jo suna tha suna diya main ne

ya'ni sab kuchh bata diya main ne

jis ko dekha gaya tha subh-e-azal

us ka jalwa dikha diya main ne

bijliyon ko machalte jab dekha

aashiyan KHud jala diya main ne

main ne har-su tumhaara gham paya

yun tera gham bhula diya main ne

tere ashkon ki baat kya kahiye

har qadam KHun baha diya main ne

sang-e-dar KHud taDap ke aa pohncha

yunhi sar ko jhuka diya main ne

raaz-e-taslim jab khula 'wasif'

naqsh-e-hasti miTa diya main ne