ghurur dil ki KHudi ka miTa diya maine

ġhurūr dil kī ḳhudī kā miTā diyā maiñ ne

banā ke ḳhuun ko paanī bahā diyā maiñ ne

kuchh ārzūeñ thiiñ māyūs dil kī Dhāras ko

unheñ bhī ḳhvāb samajh kar bhulā diyā maiñ ne

bhare haiñ harf-e-tamannā meñ saikḌoñ daftar

miTāyā us ko to sab kuchh miTā diyā maiñ ne

añdherī raat mohabbat kī aur āñkheñ band

charāġh paas na thā dil jalā diyā maiñ ne

zamāna rotā hai maiñ ḳhush huuñ pī ke zahr kā jaam

ye roz roz kā jhagḌā miTā diyā maiñ ne

jab aa ke tā-ba-shajar barq ho ga.ī vāpas

to aaj ḳhud hī nasheman jalā diyā maiñ ne

dar-e-habīb pe sar be-ḳhudī meñ rakh ke 'munīr'

jabīñ se naqsh-e-sukūñ ko miTā diyā maiñ ne

ghurur dil ki KHudi ka miTa diya main ne

bana ke KHun ko pani baha diya main ne

kuchh aarzuen thin mayus dil ki Dhaaras ko

unhen bhi KHwab samajh kar bhula diya main ne

bhare hain harf-e-tamanna mein saikDon daftar

miTaya us ko to sab kuchh miTa diya main ne

andheri raat mohabbat ki aur aankhen band

charagh pas na tha dil jala diya main ne

zamana rota hai main KHush hun pi ke zahr ka jam

ye roz roz ka jhagDa miTa diya main ne

jab aa ke ta-ba-shajar barq ho gai wapas

to aaj KHud hi nasheman jala diya main ne

dar-e-habib pe sar be-KHudi mein rakh ke 'munir'

jabin se naqsh-e-sukun ko miTa diya main ne