bujhne lagi nazar to mujhe bolna paDa

bujhne lagī nazar to mujhe bolnā paḌā

jalne lagā jo ghar to mujhe bolnā paḌā

āñkhoñ se nafratoñ kā Tapakne lagā lahū

kaTne lage jo sar to mujhe bolnā paḌā

rusvā.ī khā chukī mire āñgan kī raunaqeñ

chīḳhe jo bām-o-dar to mujhe bolnā paḌā

fāqoñ kī sūliyoñ pe baḌī maslahat ke saath

chaḌhne lage bashar to mujhe bolnā paḌā

vo mujh se keh rahā thā dhamāke pe sabr kar

maiñ thā lahū meñ tar to mujhe bolnā paḌā

utreñgī kab vatan meñ parindoñ kī Toliyāñ

hākim the be-ḳhabar to mujhe bolnā paḌā

kitne savere bhasm hue shaam jal bujhīñ

lauTā na koī ghar to mujhe bolnā paḌā

bārūd se jhulas ga.e pattoñ ke āshiyāñ

chup ho ga.e shajar to mujhe bolnā paḌā

'fātir' mirī ragoñ meñ lahū karbalā kā hai

baazū rahe na sar to mujhe bolnā paḌā

bujhne lagi nazar to mujhe bolna paDa

jalne laga jo ghar to mujhe bolna paDa

aankhon se nafraton ka Tapakne laga lahu

kaTne lage jo sar to mujhe bolna paDa

ruswai kha chuki mere aangan ki raunaqen

chiKHe jo baam-o-dar to mujhe bolna paDa

faqon ki suliyon pe baDi maslahat ke sath

chaDhne lage bashar to mujhe bolna paDa

wo mujh se keh raha tha dhamake pe sabr kar

main tha lahu mein tar to mujhe bolna paDa

utrengi kab watan mein parindon ki Toliyan

hakim the be-KHabar to mujhe bolna paDa

kitne sawere bhasm hue sham jal bujhin

lauTa na koi ghar to mujhe bolna paDa

barud se jhulas gae patton ke aashiyan

chup ho gae shajar to mujhe bolna paDa

'fatir' meri ragon mein lahu karbala ka hai

bazu rahe na sar to mujhe bolna paDa