us se bichhDe hain to ashkon ke guhar le jaen
us se bichhḌe haiñ to ashkoñ ke guhar le jaa.eñ
aur kyā is ke sivā zād-e-safar le jaa.eñ
zindagī ho ga.ī sūkhe hue pattoñ kī tarah
ab havāoñ kī hai marzī ki jidhar le jaa.eñ
hameñ is shart pe dariyā ne rihā.ī dī hai
bāñdh kar paaoñ meñ ham apne bhañvar le jaa.eñ
dard tanhā.ī kasak zaḳhm tamannā aañsū
itne chehre haiñ pareshāñ kise ghar le jaa.eñ
jin kī āñkhoñ ko nahīñ miltā haqīqat kā surāġh
'āshnā' vo mirā andāz-e-nazar le jaa.eñ
us se bichhDe hain to ashkon ke guhar le jaen
aur kya is ke siwa zad-e-safar le jaen
zindagi ho gai sukhe hue patton ki tarah
ab hawaon ki hai marzi ki jidhar le jaen
hamein is shart pe dariya ne rihai di hai
bandh kar paon mein hum apne bhanwar le jaen
dard tanhai kasak zaKHm tamanna aansu
itne chehre hain pareshan kise ghar le jaen
jin ki aankhon ko nahin milta haqiqat ka suragh
'ashna' wo mera andaz-e-nazar le jaen
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
