shikayat-e-baghban na kije chaman mein zarbul-masal na kahiye

shikāyat-e-bāġhbāñ na kiije chaman meñ zarbul-masal na kahiye

bahār hai to bahār kahiye ḳhizāñ kā radd-e-'amal na kahiye

ye ham ne maanā hasīn chīzoñ meñ husn-e-gandum bhī pur-kashish hai

magar usī ik hasīn shai ko hayāt kā mā-hasal na kahiye

jahāñ kī har shai ko hai taġhayyur badalte rahnā hai 'ain-e-fitrat

kisī zamāne ke faisle ko kuchh aur kahiye aTal na kahiye

sitam-zarīfī kī koī had hai ki tāj-e-marmar kī 'azmatoñ ko

shahanshahī kā 'urūj kahiye vafā kā ne'mul-badal na kahiye

ġhazab hai is daur-e-āgahī meñ janāb-e-vā'iz ke har suḳhan ko

rumūz-e-kaun-o-makāñ samajhiye dimāġh-o-dil kā ḳhalal na kahiye

jahān-e-she’r-o-suḳhan meñ 'muztar' ġhazal kī hai haisiyat musallam

magar kuchh aise bhī sar-phire haiñ jo keh rahe haiñ ġhazal na kahiye

shikayat-e-baghban na kije chaman mein zarbul-masal na kahiye

bahaar hai to bahaar kahiye KHizan ka radd-e-'amal na kahiye

ye hum ne mana hasin chizon mein husn-e-gandum bhi pur-kashish hai

magar usi ek hasin shai ko hayat ka ma-hasal na kahiye

jahan ki har shai ko hai taghayyur badalte rahna hai 'ain-e-fitrat

kisi zamane ke faisle ko kuchh aur kahiye aTal na kahiye

sitam-zarifi ki koi had hai ki taj-e-marmar ki 'azmaton ko

shahanshahi ka 'uruj kahiye wafa ka ne'mul-badal na kahiye

ghazab hai is daur-e-agahi mein janab-e-wa'iz ke har suKHan ko

rumuz-e-kaun-o-makan samajhiye dimagh-o-dil ka KHalal na kahiye

jahan-e-she’r-o-suKHan mein 'muztar' ghazal ki hai haisiyat musallam

magar kuchh aise bhi sar-phire hain jo keh rahe hain ghazal na kahiye