hawa-e-shab to na thi sirf KHushk patte the

havā-e-shab to na thī sirf ḳhushk patte the

jo TuuT TuuT ke hijr-e-shajar pe ro.e the

abhī abhī tumheñ sochā to kuchh na yaad aayā

abhī abhī to ham ik dūsre se bichhḌe the

tumhāre baa'd chaman par jo ik nazar Daalī

kalī kalī meñ ḳhizāñ ke charāġh jalte the

ham ik nigāh ke mujrim kaheñ ḳhudā se to kyā

tumhī kaho ki ye tum the jo dil meñ utre the

tamām 'umr vafā ke gunāh-gār rahe

ye aur baat ki ham aadmī to achchhe the

hamāre zehn pe pathrāv be-sabab to na thā

ki ham ne tīra-diloñ se sitāre māñge the

ye faḳhr bhī to bahut thā ki jo hañse ham par

vo koī ġhair nahīñ the tamām apne the

kisī kā jism hasīñ thā kisī kī ruuh hasīñ

ġharaz yahāñ ke sab insān husn-pāre the

shab-e-ḳhamosh ko tanhā.ī ne zabāñ de dī

pahāḌ gūñjte the dasht sansanāte the

vo ek baar mare jin ko thā hayāt se pyaar

jo zindagī se gurezāñ the roz marte the

na.e ḳhayāl ab aate haiñ Dhal ke aahan meñ

hamāre dil meñ kabhī khet lahlahāte the

ab ek shaḳhs jo ḳhush hai to sirf vo ḳhush hai

vo dardmand bhī the jin se dard baTte the

ye irtiqā kā chalan hai ki har zamāne meñ

purāne log na.e aadmī se Darte the

'nadīm' jo bhī mulāqāt thī adhūrī thī

ki ek chehre ke pīchhe hazār chehre the

hawa-e-shab to na thi sirf KHushk patte the

jo TuT TuT ke hijr-e-shajar pe roe the

abhi abhi tumhein socha to kuchh na yaad aaya

abhi abhi to hum ek dusre se bichhDe the

tumhaare ba'd chaman par jo ek nazar Dali

kali kali mein KHizan ke charagh jalte the

hum ek nigah ke mujrim kahen KHuda se to kya

tumhi kaho ki ye tum the jo dil mein utre the

tamam 'umr wafa ke gunah-gar rahe

ye aur baat ki hum aadmi to achchhe the

hamare zehn pe pathraw be-sabab to na tha

ki hum ne tira-dilon se sitare mange the

ye faKHr bhi to bahut tha ki jo hanse hum par

wo koi ghair nahin the tamam apne the

kisi ka jism hasin tha kisi ki ruh hasin

gharaz yahan ke sab insan husn-pare the

shab-e-KHamosh ko tanhai ne zaban de di

pahaD gunjte the dasht sansanate the

wo ek bar mare jin ko tha hayat se pyar

jo zindagi se gurezan the roz marte the

nae KHayal ab aate hain Dhal ke aahan mein

hamare dil mein kabhi khet lahlahate the

ab ek shaKHs jo KHush hai to sirf wo KHush hai

wo dardmand bhi the jin se dard baTte the

ye irtiqa ka chalan hai ki har zamane mein

purane log nae aadmi se Darte the

'nadim' jo bhi mulaqat thi adhuri thi

ki ek chehre ke pichhe hazar chehre the