ab is se baDh ke bhi kya apna iKHtiyar chale

ab is se baḌh ke bhī kyā apnā iḳhtiyār chale

ham aa.e dar pe tire aur tujhe pukār chale

tū jis galī se bhī nikle jidhar se bhī guzre

tire qadam-ba-qadam mausam-e-bahār chale

ye be-ḳhudī-e-nazar hai ki intihā.ī talab

tire hī saath liye terā intizār chale

bahut thā dīd-e-tajallī kā hausla ham ko

so ham gañvā ke nazar kā bhī e'tibār chale

baḌe bhare hue ġhusse meñ aa.e the nāseh

barasne aa.e the aur ban ke bāda-ḳhvār chale

yahī bahār hai yaaro to phir ḳhizāñ kyā hai

na daur-e-jām chale aur na zikr-e-yār chale

batā kabhī koī ham ne bhī harf-e-tanz kahā

tirī taraf se to ye tiir kitnī baar chale

kuchh un kī fikr bhī kī qāfile ne manzil par

vo kyā rafīq na the jo pas-e-ġhubār chale

'azīzo apnā safar ab girāñ na hogā tumheñ

tumhāre karb ke din bhī hamīñ guzār chale

vo chāhe rahguzar-e-yār ho ki manzil-e-dār

chale jidhar bhī ham 'iqbāl' naġhma-bār chale

ab is se baDh ke bhi kya apna iKHtiyar chale

hum aae dar pe tere aur tujhe pukar chale

tu jis gali se bhi nikle jidhar se bhi guzre

tere qadam-ba-qadam mausam-e-bahaar chale

ye be-KHudi-e-nazar hai ki intihai talab

tere hi sath liye tera intizar chale

bahut tha did-e-tajalli ka hausla hum ko

so hum ganwa ke nazar ka bhi e'tibar chale

baDe bhare hue ghusse mein aae the naseh

barasne aae the aur ban ke baada-KHwar chale

yahi bahaar hai yaro to phir KHizan kya hai

na daur-e-jam chale aur na zikr-e-yar chale

bata kabhi koi hum ne bhi harf-e-tanz kaha

teri taraf se to ye tir kitni bar chale

kuchh un ki fikr bhi ki qafile ne manzil par

wo kya rafiq na the jo pas-e-ghubar chale

'azizo apna safar ab giran na hoga tumhein

tumhaare karb ke din bhi hamin guzar chale

wo chahe rahguzar-e-yar ho ki manzil-e-dar

chale jidhar bhi hum 'iqbaal' naghma-bar chale