aatish-e-gham se wo ruKHsar damakte dekhe

ātish-e-ġham se vo ruḳhsār damakte dekhe

ham ne gulzār ḳhizāñ meñ bhī mahakte dekhe

shikva-e-tīra-shabī bhuul ga.e ahl-e-vafā

un kī palkoñ pe sitāre jo chamakte dekhe

raat bhīgī to sulagne lagā dāmān-e-ḳhayāl

saikḌoñ nashtar-e-ġham dil meñ khaTakte dekhe

kitne chehroñ pe jamī dekhī hai ehsās kī gard

kitne sīnoñ meñ alaav se dahakte dekhe

laakh sayyād ne naġhmoñ pe biThā.e pahre

ḳhush-navāyān-e-chaman phir bhī chahakte dekhe

ham ye samjhe ki safīrān-e-chaman aa.e haiñ

ḳhushk patte jo kahīñ duur khaḌakte dekhe

pyaar se thaam liye tund bagūloñ ne qadam

dasht meñ jab tire dīvāne bhaTakte dekhe

dost ban kar jo kisī ne hameñ māyūs kiyā

kitne parde nigah-o-dil se sarakte dekhe

jaane kyā baat thī un mast nigāhoñ meñ 'kalīm'

ham ne īmān hazāroñ ke bahakte dekhe

aatish-e-gham se wo ruKHsar damakte dekhe

hum ne gulzar KHizan mein bhi mahakte dekhe

shikwa-e-tira-shabi bhul gae ahl-e-wafa

un ki palkon pe sitare jo chamakte dekhe

raat bhigi to sulagne laga daman-e-KHayal

saikDon nashtar-e-gham dil mein khaTakte dekhe

kitne chehron pe jami dekhi hai ehsas ki gard

kitne sinon mein alaw se dahakte dekhe

lakh sayyaad ne naghmon pe biThae pahre

KHush-nawayan-e-chaman phir bhi chahakte dekhe

hum ye samjhe ki safiran-e-chaman aae hain

KHushk patte jo kahin dur khaDakte dekhe

pyar se tham liye tund bagulon ne qadam

dasht mein jab tere diwane bhaTakte dekhe

dost ban kar jo kisi ne hamein mayus kiya

kitne parde nigah-o-dil se sarakte dekhe

jaane kya baat thi un mast nigahon mein 'kalim'

hum ne iman hazaron ke bahakte dekhe