KHarabe mein bauchhaar ho kar rahegi

ḳharābe meñ bauchhār ho kar rahegī

galī dil kī gulzār ho kar rahegī

hukūmat ġhamoñ kī nahīñ chalne vaalī

masarrat kī yalġhār ho kar rahegī

ki shāḳhoñ pe phūloñ ke guchchhe to dekho

ye baġhiyā samar-dār ho kar rahegī

bhare jā.eñge ġhaar parbat girā kar

ye dhartī to hamvār ho kar rahegī

lakīreñ faqat kheñchtā jā varaq par

koī shakl tayyār ho kar rahegī

maiñ aisā fasāna sunāne ko huuñ ab

ki shab bhar tū bedār ho kar rahegī

ye pāgal havā aur safar be-karāñ ye

judā sar se dastār ho kar rahegī

chalā.ūñgā tesha meñ ab 'ājizī kā

anā us kī mismār ho kar rahegī

KHarabe mein bauchhaar ho kar rahegi

gali dil ki gulzar ho kar rahegi

hukumat ghamon ki nahin chalne wali

masarrat ki yalghaar ho kar rahegi

ki shaKHon pe phulon ke guchchhe to dekho

ye baghiya samar-dar ho kar rahegi

bhare jaenge ghaar parbat gira kar

ye dharti to hamwar ho kar rahegi

lakiren faqat khenchta ja waraq par

koi shakl tayyar ho kar rahegi

main aisa fasana sunane ko hun ab

ki shab bhar tu bedar ho kar rahegi

ye pagal hawa aur safar be-karan ye

juda sar se dastar ho kar rahegi

chalaunga tesha mein ab 'ajizi ka

ana us ki mismar ho kar rahegi