tere shahr-e-rang-o-bu ke manzar jhuTe lagte hain

tere shahr-e-rang-o-bū ke manzar jhūTe lagte haiñ

saare aazar masnū'ī haiñ patthar jhūTe lagte haiñ

jang-e-baqā ik nāTak jaisī zaḳhm haiñ rangoñ ke dhabbe

raqs-e-junūñ hai ek numā.ish ḳhanjar jhūTe lagte haiñ

jashn-e-bahārāñ ik dhokā hai phuul haiñ saare kāġhaz ke

ḳhushk hai sāgar siip hai naqlī gauhar jhūTe lagte haiñ

bazm-e-vafā hai suunī suunī sham'-e-tamannā hai ḳhāmosh

kūcha-e-jānāñ ujḌā ujḌā dil-bar jhūTe lagte haiñ

nā'roñ meñ jazbāt nahīñ haiñ āvāzeñ haiñ ḳhālī Dhol

jumle be-dam lafz haiñ sākit masdar jhūTe lagte haiñ

aaj bhī sarmad hai suulī par zahr piye jaa.e suqrāt

aaj bhī hai insāf pashemāñ dāvar jhūTe lagte haiñ

chalte chalte thak ga.iiñ āñkheñ sub.h milī to kaalī sī

ye bhī 'alī' hai koī manzil rahbar jhūTe lagte haiñ

tere shahr-e-rang-o-bu ke manzar jhuTe lagte hain

sare aazar masnu'i hain patthar jhuTe lagte hain

jang-e-baqa ek naTak jaisi zaKHm hain rangon ke dhabbe

raqs-e-junun hai ek numaish KHanjar jhuTe lagte hain

jashn-e-bahaaran ek dhoka hai phul hain sare kaghaz ke

KHushk hai sagar sip hai naqli gauhar jhuTe lagte hain

bazm-e-wafa hai suni suni sham'-e-tamanna hai KHamosh

kucha-e-jaanan ujDa ujDa dil-bar jhuTe lagte hain

na'ron mein jazbaat nahin hain aawazen hain KHali Dhol

jumle be-dam lafz hain sakit masdar jhuTe lagte hain

aaj bhi sarmad hai suli par zahr piye jae suqraat

aaj bhi hai insaf pasheman dawar jhuTe lagte hain

chalte chalte thak gain aankhen subh mili to kali si

ye bhi 'ali' hai koi manzil rahbar jhuTe lagte hain