wo hum ko dil mein rakkhega ya dil se ab nikalega

vo ham ko dil meñ rakkhegā yā dil se ab nikālegā

uThegā jab talak parda tajassus maar Dālegā

maiñ aksar jāñchne ko ye bas apnā haq jatātā huuñ

kahāñ tak baat mānegā kahāñ par ham ko Tālegā

ta'ayyun kab hai mumkin ab ta'alluq kā ravayyoñ se

use ham par yaqīñ hai zaḳhm sab chup-chāp khā legā

mohabbat kī Dagar par jo bhī nikle soch kar nikle

safar ye vo nahīñ jo lāziman manzil bhī pā legā

kabhī sochā gayā jo thak ke dil kī vāguzārī kā

savāl uTThā yahī masrūfiyat kyā aur pālegā

chalan ahl-e-vafā kā hai aTal ḳhāmoshiyāñ 'abrak'

zamāna dekhtā hai sab vo ḳhud qissa uchhālegā

wo hum ko dil mein rakkhega ya dil se ab nikalega

uThega jab talak parda tajassus mar Dalega

main aksar jaanchne ko ye bas apna haq jatata hun

kahan tak baat manega kahan par hum ko Talega

ta'ayyun kab hai mumkin ab ta'alluq ka rawayyon se

use hum par yaqin hai zaKHm sab chup-chap kha lega

mohabbat ki Dagar par jo bhi nikle soch kar nikle

safar ye wo nahin jo laziman manzil bhi pa lega

kabhi socha gaya jo thak ke dil ki waguzari ka

sawal uTTha yahi masrufiyat kya aur palega

chalan ahl-e-wafa ka hai aTal KHamoshiyan 'abrak'

zamana dekhta hai sab wo KHud qissa uchhaalega