jo ishq karne lage ho to itna dhyan rahe

jo 'ishq karne lage ho to itnā dhyān rahe

ki barqarār ye tauqīr-e-ḳhāndān rahe

jo un kī bazm meñ ḳhāmosh kar diye ga.e the

sunā hai ḳhvāb vo tā-'umr be-zabān rahe

ham apnī apnī mohabbat ko laakh bhuul chuke

magar ye baat hamāre hī darmiyān rahe

badan se ruuh rahī hai hamesha yuuñ nālāñ

parinda jaise ki piñjre se bad-gumān rahe

mohabbatoñ ko nibhā.ūñgā yuuñ ki hashr meñ bhī

zabān-e-ḳhalq pe merī hī dāstān rahe

ye iltijā hai ba-sad-shauq ai 'bilāl' ki ab

samā'atoñ meñ sadā 'ishq kī azaan rahe

jo 'ishq karne lage ho to itna dhyan rahe

ki barqarar ye tauqir-e-KHandan rahe

jo un ki bazm mein KHamosh kar diye gae the

suna hai KHwab wo ta-'umr be-zaban rahe

hum apni apni mohabbat ko lakh bhul chuke

magar ye baat hamare hi darmiyan rahe

badan se ruh rahi hai hamesha yun nalan

parinda jaise ki pinjre se bad-guman rahe

mohabbaton ko nibhaunga yun ki hashr mein bhi

zaban-e-KHalq pe meri hi dastan rahe

ye iltija hai ba-sad-shauq ai 'bilal' ki ab

sama'aton mein sada 'ishq ki azan rahe