janab-e-shar ki kudurat ka ham-rikab hun main

janāb-e-shar kī kudūrat kā ham-rikāb huuñ maiñ

zamāna laakh kahe Thiik par ḳharāb huuñ maiñ

mirā vujūd sarāpā-e-ḳhair-o-shar to nahīñ

kahīñ pe ḳhaar kahīñ shabnamī gulāb huuñ maiñ

janāb-e-shar ke fazā.il pe jo likhī na ga.ī

hai muḳhtasar sā ḳhulāsa vahī kitāb huuñ maiñ

mujhe faqīr samajhte haiñ gar samajhne do

nazar meñ maañ kī to bigḌā huā navāb huuñ maiñ

jo ḳhāmushī se nahīñ āshnā vo mujh ko paḌheñ

sukūt-e-hashr pe likkhā gayā nisāb huuñ maiñ

majāl kis kī kare koī hamsarī merī

ġhulām-e-hazrat-e-shāh-e-abū-turāb huuñ maiñ

ye imtizāj mirī shaḳhsiyat meñ hai 'haidar'

gunāh jis kā sabab hai vahī savāb huuñ maiñ

janab-e-shar ki kudurat ka ham-rikab hun main

zamana lakh kahe Thik par KHarab hun main

mera wujud sarapa-e-KHair-o-shar to nahin

kahin pe KHar kahin shabnami gulab hun main

janab-e-shar ke fazail pe jo likhi na gai

hai muKHtasar sa KHulasa wahi kitab hun main

mujhe faqir samajhte hain gar samajhne do

nazar mein man ki to bigDa hua nawab hun main

jo KHamushi se nahin aashna wo mujh ko paDhen

sukut-e-hashr pe likkha gaya nisab hun main

majal kis ki kare koi hamsari meri

ghulam-e-hazrat-e-shah-e-abu-turab hun main

ye imtizaj meri shaKHsiyat mein hai 'haidar'

gunah jis ka sabab hai wahi sawab hun main