har chand ashk ashk mera chiKHta raha

har chand ashk ashk mirā chīḳhtā rahā

mahrūm-e-harf-o-saut ye shahr-e-navā rahā

go naġhma-e-rabāb-e-nazar be-sadā rahā

ik 'umr dasht-e-dil meñ magar gūñjtā rahā

ā.īnoñ ke hujūm meñ go maiñ ghirā rahā

tanhā.iyoñ kī gard se chehra aTā rahā

maiñ tishnagī kī dhuup meñ din bhar khaḌā rahā

aur ḳhushk jalte hoñToñ meñ dariyā chhupā rahā

fursat na thī ki baiTh ke kuchh der ro bhī leñ

har shaḳhs apne ḳhvāb liye bhāgtā rahā

kis ne kiyā hai qatl pata ye na chal sake

iḳhlās kā naqāb bhī muñh par paḌā rahā

manzūr thī na mujh ko vo tajdīd-e-ltifāt

mere liye vo khiḌkī pe pahroñ khaḌā rahā

mansūb mere naam se har jurm ho gayā

mujrim jo thā vo sab kī nazar se chhupā rahā

har-chand the khule hue yādoñ ke bādbāñ

parchhā.iyoñ ke shor meñ dil Dūbtā rahā

kuchh kaam aa sakī na umīdoñ kī āzarī

ḳhvāboñ kā ik mujassama TuuTā paḌā rahā

ye pyaar ho ki tark-e-ta'alluq kī baat ho

kal 'arz-e-mudda'ā pe vo kuchh sochtā rahā

Dhālā thā pattharoñ meñ kabhī ik hasīn ḳhvāb

mere liye vo ḳhvāb hī patthar banā rahā

rah rah ke koī detā rahā dil pe dastakeñ

shab-bhar dayār-e-dil meñ 'ajab rat-jagā rahā

ilzām ik hai ye bhī mirī fard-e-jurm meñ

maiñ qātiloñ ke shahr meñ kyuuñ be-ḳhatā rahā

galiyoñ meñ DhūñDte rahe jis qatl kā surāġh

ik āstīñ pe vāqi'a us kā likhā rahā

aayā idhar na koī 'na.īmī' tamām raat

bāb-e-dayār-e-dīda-e-hairāñ khulā rahā

har chand ashk ashk mera chiKHta raha

mahrum-e-harf-o-saut ye shahr-e-nawa raha

go naghma-e-rabab-e-nazar be-sada raha

ek 'umr dasht-e-dil mein magar gunjta raha

aainon ke hujum mein go main ghira raha

tanhaiyon ki gard se chehra aTa raha

main tishnagi ki dhup mein din bhar khaDa raha

aur KHushk jalte honTon mein dariya chhupa raha

fursat na thi ki baiTh ke kuchh der ro bhi len

har shaKHs apne KHwab liye bhagta raha

kis ne kiya hai qatl pata ye na chal sake

iKHlas ka naqab bhi munh par paDa raha

manzur thi na mujh ko wo tajdid-e-ltifat

mere liye wo khiDki pe pahron khaDa raha

mansub mere nam se har jurm ho gaya

mujrim jo tha wo sab ki nazar se chhupa raha

har-chand the khule hue yaadon ke baadban

parchhaiyon ke shor mein dil Dubta raha

kuchh kaam aa saki na umidon ki aazari

KHwabon ka ek mujassama TuTa paDa raha

ye pyar ho ki tark-e-ta'alluq ki baat ho

kal 'arz-e-mudda'a pe wo kuchh sochta raha

Dhaala tha pattharon mein kabhi ek hasin KHwab

mere liye wo KHwab hi patthar bana raha

rah rah ke koi deta raha dil pe dastaken

shab-bhar dayar-e-dil mein 'ajab rat-jaga raha

ilzam ek hai ye bhi meri fard-e-jurm mein

main qatilon ke shahr mein kyun be-KHata raha

galiyon mein DhunDte rahe jis qatl ka suragh

ek aastin pe waqi'a us ka likha raha

aaya idhar na koi 'naimi' tamam raat

bab-e-dayar-e-dida-e-hairan khula raha