diye jalaen ujalon ka ehtimam karen

diye jalā.eñ ujāloñ kā ehtimām kareñ

havā.eñ apnā kareñ aap apnā kaam kareñ

maiñ jin ko haath meñ aane ke baa'd chhoḌtā huuñ

vo log merī sharāfat kā ehtirām kareñ

chalo ki aaj shikasta-diloñ ke ġham bāñTeñ

chalo ki sahrā meñ saa.e kā intizām kareñ

zarūrateñ hī safar par nikāl lā.īñ hameñ

thake badan kā taqāzā thā kuchh qayām kareñ

abhī to ḳhālī paḌā hai makān-e-dil apnā

lihāzā soch rahe haiñ ki kis ke naam kareñ

unheñ kaho ki ḳhamoshī-pasand hai 'kāshif'

unheñ kaho ki zarā muḳhtasar kalām kareñ

diye jalaen ujalon ka ehtimam karen

hawaen apna karen aap apna kaam karen

main jin ko hath mein aane ke ba'd chhoDta hun

wo log meri sharafat ka ehtiram karen

chalo ki aaj shikasta-dilon ke gham banTen

chalo ki sahra mein sae ka intizam karen

zaruraten hi safar par nikal lain hamein

thake badan ka taqaza tha kuchh qayam karen

abhi to KHali paDa hai makan-e-dil apna

lihaza soch rahe hain ki kis ke nam karen

unhen kaho ki KHamoshi-pasand hai 'kashif'

unhen kaho ki zara muKHtasar kalam karen