bas gai hai rag rag mein baam-o-dar ki KHamoshi

bas ga.ī hai rag rag meñ bām-o-dar kī ḳhāmoshī

chīrtī sī jaatī hai mujh ko ghar kī ḳhāmoshī

sub.h ke ubharne se shaam ke utarne tak

kitnī jān-levā hai dopahar kī ḳhāmoshī

chal rahī thī jab mere ghar ke jalne kī taftīsh

dekhne ke qābil thī shahr bhar kī ḳhāmoshī

kaaT lī haiñ tum ne to Tahniyāñ sabhī lekin

sun sako jo kahtī hai chup shajar kī ḳhāmoshī

toḌ bhī do chuppī ko rūThne ko taj Daalo

ho ga.ī hai parbat sī baat bhar kī ḳhāmoshī

paḌ ga.ī hai aadat ab saath tere chalne kī

bin tire kaTe kaise ye safar kī ḳhāmoshī

bas gai hai rag rag mein baam-o-dar ki KHamoshi

chirti si jati hai mujh ko ghar ki KHamoshi

subh ke ubharne se sham ke utarne tak

kitni jaan-lewa hai dopahar ki KHamoshi

chal rahi thi jab mere ghar ke jalne ki taftish

dekhne ke qabil thi shahr bhar ki KHamoshi

kaT li hain tum ne to Tahniyan sabhi lekin

sun sako jo kahti hai chup shajar ki KHamoshi

toD bhi do chuppi ko ruThne ko taj Dalo

ho gai hai parbat si baat bhar ki KHamoshi

paD gai hai aadat ab sath tere chalne ki

bin tere kaTe kaise ye safar ki KHamoshi