خالق سے التماس کرے التجا کرے

خالق سے التماس کرے التجا کرے

کوئی تو ہو جو حق میں ہمارے دعا کرے

وہ شمع حق جلے نہ بھلا کیسے حشر تک

فانوس بن کے جس کی حفاظت ہوا کرے

فرقت کا غم اٹھائے جا زندہ دلی کے ساتھ

توہین عشق ہوگی اگر تو گلہ کرے

دشمن سے ایسے کون بھلا جیت پائے گا

جو دوستی کے بھیس میں چھپ کر دغا کرے

وہ جس کا میرے قتل کی سازش میں ہاتھ ہے

الزام اس پہ کوئی نہ آئے خدا کرے

یہ دور پر فریب ہے اس دور میں سلیمؔ

ممکن نہیں ہے کوئی کسی سے وفا کرے