kaun kahta hai ki maut aai to mar jaunga

kaun kahtā hai ki maut aa.ī to mar jā.ūñgā

maiñ to dariyā huuñ samundar meñ utar jā.ūñgā

terā dar chhoḌ ke maiñ aur kidhar jā.ūñgā

ghar meñ ghir jā.ūñgā sahrā meñ bikhar jā.ūñgā

tere pahlū se jo uTThūñgā to mushkil ye hai

sirf ik shaḳhs ko pā.ūñgā jidhar jā.ūñgā

ab tire shahr meñ ā.ūñgā musāfir kī tarah

saya-e-abr kī mānind guzar jā.ūñgā

terā paimān-e-vafā raah kī dīvār banā

varna sochā thā ki jab chāhūñgā mar jā.ūñgā

chārasāzoñ se alag hai mirā me.aar ki maiñ

zaḳhm khā.ūñgā to kuchh aur sañvar jā.ūñgā

ab to ḳhurshīd ko guzre hue sadiyāñ guzrīñ

ab use DhūñDne maiñ tā-ba-sahar jā.ūñgā

zindagī sham.a kī mānind jalātā huuñ 'nadīm'

bujh to jā.ūñgā magar sub.h to kar jā.ūñgā

kaun kahta hai ki maut aai to mar jaunga

main to dariya hun samundar mein utar jaunga

tera dar chhoD ke main aur kidhar jaunga

ghar mein ghir jaunga sahra mein bikhar jaunga

tere pahlu se jo uTThunga to mushkil ye hai

sirf ek shaKHs ko paunga jidhar jaunga

ab tere shahr mein aaunga musafir ki tarah

saya-e-abr ki manind guzar jaunga

tera paiman-e-wafa rah ki diwar bana

warna socha tha ki jab chahunga mar jaunga

chaarasazon se alag hai mera mear ki main

zaKHm khaunga to kuchh aur sanwar jaunga

ab to KHurshid ko guzre hue sadiyan guzrin

ab use DhunDne main ta-ba-sahar jaunga

zindagi shama ki manind jalata hun 'nadim'

bujh to jaunga magar subh to kar jaunga