kasrat-e-jalwa se chashm-e-shauq kis mushkil mein hai

kasrat-e-jalva se chashm-e-shauq kis mushkil meñ hai

itnī sham'eñ kab haiñ jitnī raushnī mahfil meñ hai

'ishq kī dīvāngī tai kar ga.ī kitne maqām

'aql jis manzil meñ thī ab tak usī manzil meñ hai

ek andāz-e-tabassum meñ hai gum saarā chaman

ye ḳhabar kis ko kalī kī jaan kis mushkil meñ hai

dil na Thahregā to phir tūfāñ meñ lauT ā.eñge ham

dekhte haiñ kitnī vus'at dāman-e-sāhil meñ hai

chashm-e-hairāñ ko koī jalva nazar aatā nahīñ

dil kī betābī ye kahtī hai ki tū mahfil meñ hai

dil na ho shāmil to phir tanhā ḳharosh-e-sāz kyā

vo taḌap naġhme meñ kab hai jo shikast-e-dil meñ hai

ham bhī ai 'iqbāl' haiñ garm-e-safar kis shaan se

ek kāñTā paaoñ meñ hai ek kāñTā dil meñ hai

kasrat-e-jalwa se chashm-e-shauq kis mushkil mein hai

itni sham'en kab hain jitni raushni mahfil mein hai

'ishq ki diwangi tai kar gai kitne maqam

'aql jis manzil mein thi ab tak usi manzil mein hai

ek andaz-e-tabassum mein hai gum sara chaman

ye KHabar kis ko kali ki jaan kis mushkil mein hai

dil na Thahrega to phir tufan mein lauT aaenge hum

dekhte hain kitni wus'at daman-e-sahil mein hai

chashm-e-hairan ko koi jalwa nazar aata nahin

dil ki betabi ye kahti hai ki tu mahfil mein hai

dil na ho shamil to phir tanha KHarosh-e-saz kya

wo taDap naghme mein kab hai jo shikast-e-dil mein hai

hum bhi ai 'iqbaal' hain garm-e-safar kis shan se

ek kanTa paon mein hai ek kanTa dil mein hai