har shai tujhi ko samne lae to kya karun

har shai tujhī ko sāmne laa.e to kyā karūñ

har shai meñ tū hī tū nazar aa.e to kyā karūñ

tham tham ke aañkh ashk bahā.e to kyā karūñ

rah rah ke terī yaad satā.e to kyā karūñ

ye to batāte jaao agar jā rahe ho tum!

mujh ko tumhārī yaad satā.e to kyā karūñ

maanā sukūñ-navāz hai har shai bahār meñ

tere baġhair chain na aa.e to kyā karūñ

har she'r meñ sunā to gayā huuñ maiñ hāl-e-dil

lekin tirī samajh meñ na aa.e to kyā karūñ

ab 'ishq se ziyāda ġham-e-tark-e-ishq hai

ye aag bujh ke aur jalā.e to kyā karūñ

dil ho gayā hai ḳhūgar-e-bedād 'ishq meñ

un kī vafā bhī raas na aa.e to kyā karūñ

us sharm-gīñ nazar kā tasavvur agar 'shamīm'

bijlī dil-o-nazar pe girā.e to kyā karūñ

har shai tujhi ko samne lae to kya karun

har shai mein tu hi tu nazar aae to kya karun

tham tham ke aankh ashk bahae to kya karun

rah rah ke teri yaad satae to kya karun

ye to batate jao agar ja rahe ho tum!

mujh ko tumhaari yaad satae to kya karun

mana sukun-nawaz hai har shai bahaar mein

tere baghair chain na aae to kya karun

har she'r mein suna to gaya hun main haal-e-dil

lekin teri samajh mein na aae to kya karun

ab 'ishq se ziyaada gham-e-tark-e-ishq hai

ye aag bujh ke aur jalae to kya karun

dil ho gaya hai KHugar-e-bedad 'ishq mein

un ki wafa bhi ras na aae to kya karun

us sharm-gin nazar ka tasawwur agar 'shamim'

bijli dil-o-nazar pe girae to kya karun