kashida sar se tawaqqoa abas jhukaw ki thi

kashīda sar se tavaqqo.a abas jhukāv kī thī

bigaḌ gayā huuñ ki sūrat yahī banāv kī thī

vo jis ghamanD se bichhḌā gila to is kā hai

ki saarī baat mohabbat meñ rakh-rakhāv kī thī

vo mujh se pyaar na kartā to aur kyā kartā

ki dushmanī meñ bhī shiddat isī lagāv kī thī

magar ye dard-e-talab bhī sarāb hī niklā

vafā kī lahr bhī jazbāt ke bahāv kī thī

akele paar utar kar ye nāḳhudā ne kahā

musāfiro yahī qismat shikasta naav kī thī

charāġh-e-jāñ ko kahāñ tak bachā ke ham rakhte

havā bhī tez thī manzil bhī chal-chalāv kī thī

maiñ zindagī se nabard-āzmā rahā huuñ 'farāz'

maiñ jāntā thā yahī raah ik bachāv kī thī

kashida sar se tawaqqoa abas jhukaw ki thi

bigaD gaya hun ki surat yahi banaw ki thi

wo jis ghamanD se bichhDa gila to is ka hai

ki sari baat mohabbat mein rakh-rakhaw ki thi

wo mujh se pyar na karta to aur kya karta

ki dushmani mein bhi shiddat isi lagaw ki thi

magar ye dard-e-talab bhi sarab hi nikla

wafa ki lahr bhi jazbaat ke bahaw ki thi

akele par utar kar ye naKHuda ne kaha

musafiro yahi qismat shikasta naw ki thi

charagh-e-jaan ko kahan tak bacha ke hum rakhte

hawa bhi tez thi manzil bhi chal-chalaw ki thi

main zindagi se nabard-azma raha hun 'faraaz'

main jaanta tha yahi rah ek bachaw ki thi