waqt aa paDa to sabr ka paikar bhi ban gai

vaqt aa paḌā to sabr kā paikar bhī ban ga.ī

bā'd-e-husain diin kī rahbar bhī ban ga.ī

islām ko nikāl ke jalte ḳhiyām se

nūr-e-nigāh-e-dīn-e-payambar bhī ban ga.ī

'abbās ban ke shām-e-ġharībāñ meñ ik bahan

har ek kī nigāh kā mehvar bhī ban ga.ī

sīrat bhī fātima kī thī sūrat bhī fātima

islām ko bachā ke vo haidar bhī ban ga.ī

aane lage the zalzale darbār-e-shām meñ

palTā jo taḳht fāteh-e-ḳhaibar bhī ban ga.ī

bachchoñ kī tishnagī ko sañbhālā kuchh is tarah

beTī 'alī kī sāqī-e-kausar bhī ban ga.ī

aisī nahīñ misāl zamāne meñ ai 'malāz'

pyāsī bhī rah ga.ī vo samundar bhī ban ga.ī

waqt aa paDa to sabr ka paikar bhi ban gai

ba'd-e-husain din ki rahbar bhi ban gai

islam ko nikal ke jalte KHiyam se

nur-e-nigah-e-din-e-payambar bhi ban gai

'abbas ban ke sham-e-ghariban mein ek bahan

har ek ki nigah ka mehwar bhi ban gai

sirat bhi fatima ki thi surat bhi fatima

islam ko bacha ke wo haidar bhi ban gai

aane lage the zalzale darbar-e-sham mein

palTa jo taKHt fateh-e-KHaibar bhi ban gai

bachchon ki tishnagi ko sanbhaala kuchh is tarah

beTi 'ali ki saqi-e-kausar bhi ban gai

aisi nahin misal zamane mein ai 'malaz'

pyasi bhi rah gai wo samundar bhi ban gai