karam ka aur hai imkan khule to baat chale

karam kā aur hai imkāñ khule to baat chale

is iltifāt kā unvāñ khule to baat chale

kis intizār meñ thī rūh-e-ḳhud-numā.ī-e-gul

baras ke abr-e-bahārāñ khule to baat chale

kuchh ab ke ham bhī kaheñ us kī dāstān-e-visāl

magar vo zulf-e-pareshāñ khule to baat chale

jafā ye silsila-e-sad-hazār-unvāñ hai

qamīs-e-yūsuf-e-kan.āñ khule to baat chale

safar hai aur sitāroñ kā ik bayābāñ hai

musāfirī kā bhī imkāñ khule to baat chale

tilism-e-sheva-e-yārāñ khulā to kuchh na huā

kabhī ye habs-e-dil-o-jāñ khule to baat chale

sulag rahā hai ufuq bujh rahī hai ātish-e-mahr

rumūz-e-rabt-e-gurezāñ khule to baat chale

karam ka aur hai imkan khule to baat chale

is iltifat ka unwan khule to baat chale

kis intizar mein thi ruh-e-KHud-numai-e-gul

baras ke abr-e-bahaaran khule to baat chale

kuchh ab ke hum bhi kahen us ki dastan-e-visal

magar wo zulf-e-pareshan khule to baat chale

jafa ye silsila-e-sad-hazar-unwan hai

qamis-e-yusuf-e-kanan khule to baat chale

safar hai aur sitaron ka ek bayaban hai

musafiri ka bhi imkan khule to baat chale

tilism-e-shewa-e-yaran khula to kuchh na hua

kabhi ye habs-e-dil-o-jaan khule to baat chale

sulag raha hai ufuq bujh rahi hai aatish-e-mahr

rumuz-e-rabt-e-gurezan khule to baat chale