kamal-e-zabt ko KHud bhi to aazmaungi

kamāl-e-zabt ko ḳhud bhī to āzmā.ūñgī

maiñ apne haath se us kī dulhan sajā.ūñgī

supurd kar ke use chāñdnī ke hāthoñ meñ

maiñ apne ghar ke añdheroñ ko lauT ā.ūñgī

badan ke karb ko vo bhī samajh na pā.egā

maiñ dil meñ ro.ūñgī āñkhoñ meñ muskurā.ūñgī

vo kyā gayā ki rifāqat ke saare lutf ga.e

maiñ kis se ruuTh sakūñgī kise manā.ūñgī

ab us kā fan to kisī aur se huā mansūb

maiñ kis kī nazm akele meñ gungunā.ūñgī

vo ek rishta-e-benām bhī nahīñ lekin

maiñ ab bhī us ke ishāroñ pe sar jhukā.ūñgī

bichhā diyā thā gulāboñ ke saath apnā vajūd

vo so ke uTThe to ḳhvāboñ kī raakh uThā.ūñgī

samā.atoñ meñ ghane jañgaloñ kī sāñseñ haiñ

maiñ ab kabhī tirī āvāz sun na pā.ūñgī

javāz DhūñD rahā thā na.ī mohabbat kā

vo kah rahā thā ki maiñ us ko bhuul jā.ūñgī

kamal-e-zabt ko KHud bhi to aazmaungi

main apne hath se us ki dulhan sajaungi

supurd kar ke use chandni ke hathon mein

main apne ghar ke andheron ko lauT aaungi

badan ke karb ko wo bhi samajh na paega

main dil mein roungi aankhon mein muskuraungi

wo kya gaya ki rifaqat ke sare lutf gae

main kis se ruTh sakungi kise manaungi

ab us ka fan to kisi aur se hua mansub

main kis ki nazm akele mein gungunaungi

wo ek rishta-e-benam bhi nahin lekin

main ab bhi us ke ishaaron pe sar jhukaungi

bichha diya tha gulabon ke sath apna wajud

wo so ke uTThe to KHwabon ki rakh uThaungi

samaaton mein ghane jangalon ki sansen hain

main ab kabhi teri aawaz sun na paungi

jawaz DhunD raha tha nai mohabbat ka

wo kah raha tha ki main us ko bhul jaungi