kam se kam duniya se itna mera rishta ho jae

kam se kam duniyā se itnā mirā rishta ho jaa.e

koī merā bhī burā chāhne vaalā ho jaa.e

isī majbūrī meñ ye bhiiḌ ikaTThā hai yahāñ

jo tire saath nahīñ aa.e vo tanhā ho jaa.e

shukr us kā adā karne kā ḳhayāl aa.e kise

abr jab itnā ghanā ho ki añdherā ho jaa.e

haañ nahīñ chāhiye us darja mohabbat terī

ki mirā sach bhī tire jhuuT kā hissa ho jaa.e

band āñkhoñ ne sarāboñ se bachāyā hai mujhe

aañkh vaalā ho to is khel meñ andhā ho jaa.e

maiñ bhī qatra huuñ tirī baat samajh saktā huuñ

ye ki miT jaane ke Dar se koī dariyā ho jaa.e

bas isī baat pe ā.īnoñ se bigḌī merī

chāhtā thā mirā apnā koī chehra ho jaa.e

bazm-e-yārāñ meñ yahī rañg to dete haiñ maza

koī ro.e to hañsī se koī dohrā ho jaa.e

kam se kam duniya se itna mera rishta ho jae

koi mera bhi bura chahne wala ho jae

isi majburi mein ye bhiD ikaTTha hai yahan

jo tere sath nahin aae wo tanha ho jae

shukr us ka ada karne ka KHayal aae kise

abr jab itna ghana ho ki andhera ho jae

han nahin chahiye us darja mohabbat teri

ki mera sach bhi tere jhuT ka hissa ho jae

band aankhon ne sarabon se bachaya hai mujhe

aankh wala ho to is khel mein andha ho jae

main bhi qatra hun teri baat samajh sakta hun

ye ki miT jaane ke Dar se koi dariya ho jae

bas isi baat pe aainon se bigDi meri

chahta tha mera apna koi chehra ho jae

bazm-e-yaran mein yahi rang to dete hain maza

koi roe to hansi se koi dohra ho jae