kaleja munh ko aata hai shab-e-furqat jab aati hai

kalejā muñh ko aatā hai shab-e-furqat jab aatī hai

akele muñh lapeTe rote rote jaan jaatī hai

lab-e-nāzuk ke bose luuñ to missī muñh banātī hai

kaf-e-pā ko agar chūmūñ to mehñdī rañg laatī hai

dikhātī hai kabhī bhālā kabhī barchhī lagātī hai

nigāh-e-nāz-e-jānāñ ham ko kyā kyā āzmātī hai

vo bikhrāne lage zulfoñ ko chehre par to maiñ samjhā

ghaTā meñ chāñd yā mahmil meñ lailā muñh chhupātī hai

karegī apne hāthoñ aaj apnā ḳhuun mashshāta

bahut rach-rach ke talvoñ meñ tire mehñdī lagātī hai

na koī zor us ayyār par ab tak chalā apnā

yahāñ dam TūTtā hai aur dam meñ jaan jaatī hai

taḌapnā tilmilānā loTnā sar pīTnā ronā

shab-e-furqat akelī jaan par sau aafat aatī hai

pachhāḌeñ khā rahā huuñ loTtā huuñ dard-e-furqat se

ajal ke paañv TūTeñ kyuuñ nahīñ is vaqt aatī hai

kaleja munh ko aata hai shab-e-furqat jab aati hai

akele munh lapeTe rote rote jaan jati hai

lab-e-nazuk ke bose lun to missi munh banati hai

kaf-e-pa ko agar chumun to mehndi rang lati hai

dikhati hai kabhi bhaala kabhi barchhi lagati hai

nigah-e-naz-e-jaanan hum ko kya kya aazmati hai

wo bikhrane lage zulfon ko chehre par to main samjha

ghaTa mein chand ya mahmil mein laila munh chhupati hai

karegi apne hathon aaj apna KHun mashshata

bahut rach-rach ke talwon mein tere mehndi lagati hai

na koi zor us ayyar par ab tak chala apna

yahan dam TuTta hai aur dam mein jaan jati hai

taDapna tilmilana loTna sar piTna rona

shab-e-furqat akeli jaan par sau aafat aati hai

pachhaDen kha raha hun loTta hun dard-e-furqat se

ajal ke panw TuTen kyun nahin is waqt aati hai