kal tak kitne hangame the ab kitni KHamoshi hai

kal tak kitne hañgāme the ab kitnī ḳhāmoshī hai

pahle duniyā thī ghar meñ ab duniyā se rū-poshī hai

pal bhar jaage gahrī niind kā jhoñkā aayā Duub ga.e

koī ġhaflat sī ġhaflat madhoshī sī madhoshī hai

jitnā pyaar baḌhāyā ham se utnā dard diyā dil ko

jitne duur hue ho ham se utnī ham-āġhoshī hai

sab ko phuul aur kaliyāñ bāñTo ham ko do sūkhe patte

ye kaise tohfe laa.e ho ye kyā barg-faroshī hai

rañg-e-haqīqat kyā ubhregā ḳhvāb hī dekhte rahne se

jis ko tum koshish kahte ho vo to lazzat-koshī hai

hosh meñ sab kuchh dekh ke bhī chup rahne kī majbūrī thī

kitnī mānī-ḳhez 'jamīl' hamārī ye be-hoshī hai

kal tak kitne hangame the ab kitni KHamoshi hai

pahle duniya thi ghar mein ab duniya se ru-poshi hai

pal bhar jage gahri nind ka jhonka aaya Dub gae

koi ghaflat si ghaflat madhoshi si madhoshi hai

jitna pyar baDhaya hum se utna dard diya dil ko

jitne dur hue ho hum se utni ham-aghoshi hai

sab ko phul aur kaliyan banTo hum ko do sukhe patte

ye kaise tohfe lae ho ye kya barg-faroshi hai

rang-e-haqiqat kya ubhrega KHwab hi dekhte rahne se

jis ko tum koshish kahte ho wo to lazzat-koshi hai

hosh mein sab kuchh dekh ke bhi chup rahne ki majburi thi

kitni mani-KHez 'jamil' hamari ye be-hoshi hai