kal main inhi raston se guzra to bahut roya

kal maiñ inhī rastoñ se guzrā to bahut royā

sochī huī bātoñ ko sochā to bahut royā

dil merā har ik shai ko ā.īna samajhtā hai

Dhalte hue sūraj ko dekhā to bahut royā

jo shaḳhs na royā thā taptī huī rāhoñ meñ

dīvār ke saa.e meñ baiThā to bahut royā

āsāñ to nahīñ apnī hastī se guzar jaanā

utrā jo samundar meñ dariyā to bahut royā

jis mauj se ubhrā thā us mauj pe kyā guzrī

sahrā meñ vo bādal kā TukḌā to bahut royā

ham terī tabī.at ko 'ḳhurshīd' nahīñ samjhe

patthar nazar aatā thā royā to bahut royā

kal main inhi raston se guzra to bahut roya

sochi hui baaton ko socha to bahut roya

dil mera har ek shai ko aaina samajhta hai

Dhalte hue suraj ko dekha to bahut roya

jo shaKHs na roya tha tapti hui rahon mein

diwar ke sae mein baiTha to bahut roya

aasan to nahin apni hasti se guzar jaana

utra jo samundar mein dariya to bahut roya

jis mauj se ubhra tha us mauj pe kya guzri

sahra mein wo baadal ka TukDa to bahut roya

hum teri tabiat ko 'KHurshid' nahin samjhe

patthar nazar aata tha roya to bahut roya