kahin bhi saya nahin kis taraf chale koi

kahīñ bhī saaya nahīñ kis taraf chale koī

daraḳht kaaT gayā hai hare-bhare koī

ajiib rut hai zabāñ zā.iqe se hai mahrūm

tamām shahr hī chup ho to kyā kare koī

hamāre shahr meñ hai vo gurez kā aalam

charāg bhī na jalā.e charāg se koī

ye zindagī hai safar munjamid samundar kā

vahīñ pe shaq ho zamīñ jis jagah ruke koī

palaT kar aa nahīñ sakte ga.e hue lamhe

tamām umr bhī ab jāgtā rahe koī

misāl-e-aks muqayyad hisār-e-zāt meñ huuñ

vo mauj huuñ jise rasta na mil sake koī

phir is ke ba.ad bikhar jā.ūñ ret kī sūrat

bas ek baar mujhe TuuT kar mile koī

huzūr-e-husn ye dil kāsa-e-gadā.ī hai

huuñ vo faqīr jise bhiik bhī na de koī

savāl us ne bhī koī nahīñ kiyā 'shahzād'

javāb ban na paḌe jis ke sāmne koī

kahin bhi saya nahin kis taraf chale koi

daraKHt kaT gaya hai hare-bhare koi

ajib rut hai zaban zaiqe se hai mahrum

tamam shahr hi chup ho to kya kare koi

hamare shahr mein hai wo gurez ka aalam

charag bhi na jalae charag se koi

ye zindagi hai safar munjamid samundar ka

wahin pe shaq ho zamin jis jagah ruke koi

palaT kar aa nahin sakte gae hue lamhe

tamam umr bhi ab jagta rahe koi

misal-e-aks muqayyad hisar-e-zat mein hun

wo mauj hun jise rasta na mil sake koi

phir is ke baad bikhar jaun ret ki surat

bas ek bar mujhe TuT kar mile koi

huzur-e-husn ye dil kasa-e-gadai hai

hun wo faqir jise bhik bhi na de koi

sawal us ne bhi koi nahin kiya 'shahzad'

jawab ban na paDe jis ke samne koi