kahan ki aah-o-zariyan malal tak nahin hua

kahāñ kī āh-o-zāriyāñ malāl tak nahīñ huā

dil-e-ḳharāb pā.emāl yak-ba-yak nahīñ huā

bikhar ga.e the TuuT kar magar ham is ke ba.ad hī

kuchh is tarah sañbhal ga.e kisī ko shak nahīñ huā

baḌī hī karbnāk thī vo pahlī raat hijr kī

dobāra dil meñ aisā dard aaj tak nahīñ huā

sitamgaroñ se dostī chalī tamām zindagī

sitam-zadoñ pe mehrbāñ magar falak nahīñ huā

'aqīl' marg-e-ārzū koī ḳhabar na ban sakī

ye hādisa huā magar lab-e-saḌak nahīñ huā

kahan ki aah-o-zariyan malal tak nahin hua

dil-e-KHarab paemal yak-ba-yak nahin hua

bikhar gae the TuT kar magar hum is ke baad hi

kuchh is tarah sanbhal gae kisi ko shak nahin hua

baDi hi karbnak thi wo pahli raat hijr ki

dobara dil mein aisa dard aaj tak nahin hua

sitamgaron se dosti chali tamam zindagi

sitam-zadon pe mehrban magar falak nahin hua

'aqil' marg-e-arzu koi KHabar na ban saki

ye hadisa hua magar lab-e-saDak nahin hua