kabhi taqsir jis ne ki hi nahin

kabhī taqsīr jis ne kī hī nahīñ

ham se pūchho to aadmī hī nahīñ

mar chuke jīte-jī ḳhushā qismat

is se achchhī to zindagī hī nahīñ

dostī aur kisī ġharaz ke liye

vo tijārat hai dostī hī nahīñ

yā vafā hī na thī zamāne meñ

yā magar dostoñ ne kī hī nahīñ

kuchh mirī baat kīmiyā to na thī

aisī bigḌī ki phir banī hī nahīñ

jis ḳhushī ko na ho qayām-o-davām

ġham se bad-tar hai vo ḳhushī hī nahīñ

bandagī kā shu.ūr hai jab tak

banda-parvar vo bandagī hī nahīñ

ek do ghūñT jām-e-vahdat ke

jo na pī le vo muttaqī hī nahīñ

kī hai zāhid ne aap duniyā tark

yā muqaddar meñ us ke thī hī nahīñ

kabhi taqsir jis ne ki hi nahin

hum se puchho to aadmi hi nahin

mar chuke jite-ji KHusha qismat

is se achchhi to zindagi hi nahin

dosti aur kisi gharaz ke liye

wo tijarat hai dosti hi nahin

ya wafa hi na thi zamane mein

ya magar doston ne ki hi nahin

kuchh meri baat kimiya to na thi

aisi bigDi ki phir bani hi nahin

jis KHushi ko na ho qayam-o-dawam

gham se bad-tar hai wo KHushi hi nahin

bandagi ka shuur hai jab tak

banda-parwar wo bandagi hi nahin

ek do ghunT jam-e-wahdat ke

jo na pi le wo muttaqi hi nahin

ki hai zahid ne aap duniya tark

ya muqaddar mein us ke thi hi nahin