kabhi jangal kabhi sahra kabhi dariya likkha

kabhī jangal kabhī sahrā kabhī dariyā likkhā

ab kahāñ yaad ki ham ne tujhe kyā kyā likkhā

shahr bhī likkhā makāñ likkhā mohalla likkhā

ham kahāñ ke the magar us ne kahāñ kā likkhā

din ke māthe pe to sūraj hī likhā thā tū ne

raat kī palkoñ pe kis ne ye añdherā likkhā

sun liyā hogā havāoñ meñ bikhar jaatā hai

is liye bachche ne kāġhaz pe gharauñdā likkhā

kyā ḳhabar us ko lage kaisā ki ab ke ham ne

apne ik ḳhat meñ use dost purānā likkhā

apne afsāne kī shohrat use manzūr na thī

us ne kirdār badal kar mirā qissa likkhā

ham ne kab she'r kahe ham se kahāñ she'r hue

marsiya ek faqat apnī sadī kā likkhā

kabhi jangal kabhi sahra kabhi dariya likkha

ab kahan yaad ki hum ne tujhe kya kya likkha

shahr bhi likkha makan likkha mohalla likkha

hum kahan ke the magar us ne kahan ka likkha

din ke mathe pe to suraj hi likha tha tu ne

raat ki palkon pe kis ne ye andhera likkha

sun liya hoga hawaon mein bikhar jata hai

is liye bachche ne kaghaz pe gharaunda likkha

kya KHabar us ko lage kaisa ki ab ke hum ne

apne ek KHat mein use dost purana likkha

apne afsane ki shohrat use manzur na thi

us ne kirdar badal kar mera qissa likkha

hum ne kab she'r kahe hum se kahan she'r hue

marsiya ek faqat apni sadi ka likkha