kabhi bahar nahin aati sada parde mein rahti hai

kabhī bāhar nahīñ aatī sadā parde meñ rahtī hai

ḳhudā jaane tamanna kis ke bahkāve meñ rahtī hai

tumhārā saath merī zindagī bhar kī kamā.ī thī

ga.e ho jab se tum ye zindagī ghāTe meñ rahtī hai

jise ham log mil kar āshram meñ chhoḌ aa.e the

vo charḳhā kāt.tī hai chāñd ke chehre meñ rahtī hai

use ham par to dete haiñ magar uḌne nahīñ dete

hamārī beTī bulbul hai magar piñjre meñ rahtī hai

kamāñ se tiir chhūTe to kabhī vāpas nahīñ aatā

magar us ko ġhalat-fahmī mere baare meñ rahtī hai

vo jab tak lauT kar schōl se ghar aa nahīñ jaatā

hamārī jaan aTkī har ghaḌī beTe meñ rahtī hai

Thaharne hī nahīñ detī haiñ ghar meñ shahr kī ḳhabreñ

zarā bāhar nikalte haiñ to jaañ ḳhatre meñ rahtī hai

kabhi bahar nahin aati sada parde mein rahti hai

KHuda jaane tamanna kis ke bahkawe mein rahti hai

tumhaara sath meri zindagi bhar ki kamai thi

gae ho jab se tum ye zindagi ghaTe mein rahti hai

jise hum log mil kar aashram mein chhoD aae the

wo charKHa katti hai chand ke chehre mein rahti hai

use hum par to dete hain magar uDne nahin dete

hamari beTi bulbul hai magar pinjre mein rahti hai

kaman se tir chhuTe to kabhi wapas nahin aata

magar us ko ghalat-fahmi mere bare mein rahti hai

wo jab tak lauT kar school se ghar aa nahin jata

hamari jaan aTki har ghaDi beTe mein rahti hai

Thaharne hi nahin deti hain ghar mein shahr ki KHabren

zara bahar nikalte hain to jaan KHatre mein rahti hai