kab talak muddaa kahe koi

kab talak mudda.ā kahe koī

na suno tum to kyā kahe koī

ġhairat-e-ishq ko qubūl nahīñ

ki tujhe bevafā kahe koī

minnat-e-nā-ḳhudā nahīñ manzūr

chāhe us ko ḳhudā kahe koī

har koī apne ġham meñ hai masrūf

kis ko dard-āshnā kahe koī

kaun achchhā hai is zamāne meñ

kyuuñ kisī ko burā kahe koī

koī to haq-shanās ho yārab

zulm ko nā-ravāñ kahe koī

vo na samjheñge in kināyoñ ko

jo kahe barmalā kahe koī

aarzū hai ki merā qissa-e-shauq

aaj mere sivā kahe koī

jī meñ aatā hai kuchh kahūñ 'nāsir'

kyā ḳhabar sun ke kyā kahe koī

kab talak muddaa kahe koi

na suno tum to kya kahe koi

ghairat-e-ishq ko qubul nahin

ki tujhe bewafa kahe koi

minnat-e-na-KHuda nahin manzur

chahe us ko KHuda kahe koi

har koi apne gham mein hai masruf

kis ko dard-ashna kahe koi

kaun achchha hai is zamane mein

kyun kisi ko bura kahe koi

koi to haq-shanas ho yarab

zulm ko na-rawan kahe koi

wo na samjhenge in kinayon ko

jo kahe barmala kahe koi

aarzu hai ki mera qissa-e-shauq

aaj mere siwa kahe koi

ji mein aata hai kuchh kahun 'nasir'

kya KHabar sun ke kya kahe koi