juhi ki is Dali se koi kaise aankh milae

juuhī kī is Daalī se koī kaise aañkh milā.e

jo apnī ḳhush-bū ke bojh se duhrī ho ho jaa.e

lagtā hai shahroñ meñ junūñ ke mausam ab nahīñ aate

ham to sahrā meñ baiThe haiñ dhuup kā farsh bichhā.e

sannāTā peḌoñ par baiThā sannāTā har chhat par

sannāTe se sab Darte haiñ kaun āvāz lagā.e

kitnī nīñdeñ qatl huiiñ kal shab ke maqtal meñ

sub.h ke ruḳhsāroñ kī surḳhī hī ye baat batā.e

jis ke aage aage bādal jis ke pīchhe ḳhush-bū

ham sahrā vāloñ tak koī vo mausam le aa.e

ham bhī haiñ pardes meñ lekin raam nahīñ ham 'rāhī'

aa.e aur koī samjhā kar ham ko ghar le aa.e

juhi ki is Dali se koi kaise aankh milae

jo apni KHush-bu ke bojh se duhri ho ho jae

lagta hai shahron mein junun ke mausam ab nahin aate

hum to sahra mein baiThe hain dhup ka farsh bichhae

sannaTa peDon par baiTha sannaTa har chhat par

sannaTe se sab Darte hain kaun aawaz lagae

kitni ninden qatl huin kal shab ke maqtal mein

subh ke ruKHsaron ki surKHi hi ye baat batae

jis ke aage aage baadal jis ke pichhe KHush-bu

hum sahra walon tak koi wo mausam le aae

hum bhi hain pardes mein lekin ram nahin hum 'rahi'

aae aur koi samjha kar hum ko ghar le aae