haq-o-insaf ki be-KHauf himayat ki hai

haq-o-insāf kī be-ḳhauf himāyat kī hai

ye baġhāvat hai to haañ ham ne baġhāvat kī hai

ek nāseh jo hai bātin meñ mire ai nāseh

maiñ tirī kuchh na sunūñ us ne nasīhat kī hai

kar ke tazlīl mire 'ishq-e-butāñ kī ai shaiḳh

tū ne insān kī fitrat se baġhāvat kī hai

shauq se shaiḳh-o-barahman mirī tanqīd kareñ

maiñ ne bātil kī nahīñ haq kī himāyat kī hai

ḳhvāh kitne hī muḳhālif hoñ ḳhayālāt magar

aaj tak maiñ ne kisī kī na mazammat kī hai

mujh ko rusvā.ī kā kuchh ḳhauf nahīñ hai 'rāhī'

maiñ ne 'izzat nahīñ bechī hai mohabbat kī hai

haq-o-insaf ki be-KHauf himayat ki hai

ye baghawat hai to han hum ne baghawat ki hai

ek naseh jo hai baatin mein mere ai naseh

main teri kuchh na sunun us ne nasihat ki hai

kar ke tazlil mere 'ishq-e-butan ki ai shaiKH

tu ne insan ki fitrat se baghawat ki hai

shauq se shaiKH-o-barahman meri tanqid karen

main ne baatil ki nahin haq ki himayat ki hai

KHwah kitne hi muKHalif hon KHayalat magar

aaj tak main ne kisi ki na mazammat ki hai

mujh ko ruswai ka kuchh KHauf nahin hai 'rahi'

main ne 'izzat nahin bechi hai mohabbat ki hai