ye nahin wo dekh kar mujhko kabhi ThiTka na ho

ye nahīñ vo dekh kar mujh ko kabhī ThiTkā na ho

ye alag hai bhiiḌ meñ us ne mujhe dekhā na ho

dekh sab kuchh ye hayā keh de kahīñ aisā na ho

itnā hī sharmā ki logoñ meñ ġhalat charchā na ho

be-irāda aap ne kholī thī khiḌkī sab sahīh

ye bhī mumkin aap ne qasdan mujhe dekhā na ho

niiñd ke anjum-kade sunte haiñ dil-kash haiñ bahut

lekin us ko kyā ḳhabar jo 'umr bhar soyā na ho

dil ki sho'la-zār thā ik din ab aisā bujh gayā

jaise ab is raakh kī tah meñ koī sho.alā na ho

aa.ine meñ ik hayūlā hī sā aatā hai nazar

kyā ḳhabar maiñ ne abhī tak ḳhud ko pahchānā na ho

sahmī ummīdoñ kī uñglī pakḌe zaḳhmī aarzū

chaḌhtī hai us baam par jis baam kā ziinā na ho

hil rahe haiñ yaad kī khiḌkī ke sab parde abhī

raat ke pichhle pahar koī yahāñ aayā na ho

TuuT kar bhī aur baḌhte jaate haiñ har roz but

koī aazar nafs ke tah-ḳhāne meñ baiThā na ho

bāhar itnā shor-o-ġhul hai un kī yādoñ kā bhī dam

ghuT ke rah jaa.e agar dil kā ye sannāTā na ho

aur zindānoñ kī dīvāreñ uThā lo vaqt hai

nā-ḳhudā ehsās kā shāyad abhī jaagā na ho

justujū meñ thā mirī tū bhī mujhe aisā lagā

lai meñ ḳhud hī aa gayā bas ab tū ranjīda na ho

pūchh kar merī tamanna aur baḌhā dī ik ḳhalish

ye bajā hai aap kā is se koī manshā na ho

zindagī ke be-nishāñ sāhil ke ḳhush-bāsho kahīñ

devtā tūfāñ kā cupid kī tarah andhā na ho

'āriz-e-gul par 'na.īmī' āñsuoñ ke ye nishāñ

koī phūloñ se lipaT kar raat bhar royā na ho

ye nahin wo dekh kar mujh ko kabhi ThiTka na ho

ye alag hai bhiD mein us ne mujhe dekha na ho

dekh sab kuchh ye haya keh de kahin aisa na ho

itna hi sharma ki logon mein ghalat charcha na ho

be-irada aap ne kholi thi khiDki sab sahih

ye bhi mumkin aap ne qasdan mujhe dekha na ho

nind ke anjum-kade sunte hain dil-kash hain bahut

lekin us ko kya KHabar jo 'umr bhar soya na ho

dil ki sho'la-zar tha ek din ab aisa bujh gaya

jaise ab is rakh ki tah mein koi shoala na ho

aaine mein ek hayula hi sa aata hai nazar

kya KHabar main ne abhi tak KHud ko pahchana na ho

sahmi ummidon ki ungli pakDe zaKHmi aarzu

chaDhti hai us baam par jis baam ka zina na ho

hil rahe hain yaad ki khiDki ke sab parde abhi

raat ke pichhle pahar koi yahan aaya na ho

TuT kar bhi aur baDhte jate hain har roz but

koi aazar nafs ke tah-KHane mein baiTha na ho

bahar itna shor-o-ghul hai un ki yaadon ka bhi dam

ghuT ke rah jae agar dil ka ye sannaTa na ho

aur zindanon ki diwaren uTha lo waqt hai

na-KHuda ehsas ka shayad abhi jaga na ho

justuju mein tha meri tu bhi mujhe aisa laga

lai mein KHud hi aa gaya bas ab tu ranjida na ho

puchh kar meri tamanna aur baDha di ek KHalish

ye baja hai aap ka is se koi mansha na ho

zindagi ke be-nishan sahil ke KHush-basho kahin

dewta tufan ka cupid ki tarah andha na ho

'ariz-e-gul par 'naimi' aansuon ke ye nishan

koi phulon se lipaT kar raat bhar roya na ho