yaad-e-safar se rasta itna mahak gaya

yād-e-safar se rāsta itnā mahak gayā

maiñ tere ghar ke paas pahuñch kar bhaTak gayā

raat itnī chāñdnī thī ki har rāh-rau ke saath

maiñ apnī justujū meñ bahut duur tak gayā

mauj-e-nasīm-e-dard uThī pichhlī raat yuuñ

dil shāḳh-e-jāñ pe sūrat-e-ġhuncha chaTak gayā

yād-e-vafā ke ek hī jhoñke se jhuul kar

'ishq us kā misl-e-shāḳh-e-subuk-tan lachak gayā

muddat ke baa'd aaj sar-e-rahguzār phir

shānoñ se ek shoḳh ke āñchal sarak gayā

dohrāyā aaj us ne kuchh aise vafā kā giit

sāz-e-dil-e-ḳhamosh meñ sho'la lapak gayā

aise lagā ki maiñ bhī huuñ sūraj jo tū hai chāñd

jab mujh ko dekh kar tirā chehra chamak gayā

yuuñ bhī huā ki vus'at-e-sahrā ke husn se

mānind-e-jām-e-mai dil-e-tishna chhalak gayā

tūl-e-safar kā ġham thā ki ḳhatm-e-safar kā ranj

manzil 'nazar' paḌī to dil-e-zār thak gayā

yaad-e-safar se rasta itna mahak gaya

main tere ghar ke pas pahunch kar bhaTak gaya

raat itni chandni thi ki har rah-rau ke sath

main apni justuju mein bahut dur tak gaya

mauj-e-nasim-e-dard uThi pichhli raat yun

dil shaKH-e-jaan pe surat-e-ghuncha chaTak gaya

yaad-e-wafa ke ek hi jhonke se jhul kar

'ishq us ka misl-e-shaKH-e-subuk-tan lachak gaya

muddat ke ba'd aaj sar-e-rahguzar phir

shanon se ek shoKH ke aanchal sarak gaya

dohraya aaj us ne kuchh aise wafa ka git

saz-e-dil-e-KHamosh mein sho'la lapak gaya

aise laga ki main bhi hun suraj jo tu hai chand

jab mujh ko dekh kar tera chehra chamak gaya

yun bhi hua ki wus'at-e-sahra ke husn se

manind-e-jam-e-mai dil-e-tishna chhalak gaya

tul-e-safar ka gham tha ki KHatm-e-safar ka ranj

manzil 'nazar' paDi to dil-e-zar thak gaya