wo KHud gum ho gaya jis ko talash-e-yar mein dekha

vo ḳhud gum ho gayā jis ko talāsh-e-yār meñ dekhā

'ajab andher ye is 'ishq kī sarkār meñ dekhā

ġharaz ye hai ki dekhā sab ne jalva terī qudrat kā

kisī ne phuul meñ dekhā kisī ne ḳhaar meñ dekhā

natīja shūmī-e-taqdīr se 'arz-e-tamannā kā

jo kuchh inkār meñ dekhā vahī iqrār meñ dekhā

paḌā majnūñ ko jis se sābiqa sahrā-navardī meñ

vo 'ālam ham ne ghar baiThe dar-o-dīvār meñ dekhā

jhukā kar sar ye us ne kyuuñ kahā allāh hāfiz hai

ilāhī ḳhair ho kyā hijr ke bīmār meñ dekhā

vo mujh se pūchhte haiñ kis meñ dekhā 'aib-e-ḳhud-bīnī

burā māneñge māneñ keh to duuñ sarkār meñ dekhā

ye hī dekho ki us ko dekh kar kyā merī hālat hai

'qamar' ye kuchh na pūchho kyā nigāh-e-yār meñ dekhā

wo KHud gum ho gaya jis ko talash-e-yar mein dekha

'ajab andher ye is 'ishq ki sarkar mein dekha

gharaz ye hai ki dekha sab ne jalwa teri qudrat ka

kisi ne phul mein dekha kisi ne KHar mein dekha

natija shumi-e-taqdir se 'arz-e-tamanna ka

jo kuchh inkar mein dekha wahi iqrar mein dekha

paDa majnun ko jis se sabiqa sahra-nawardi mein

wo 'alam hum ne ghar baiThe dar-o-diwar mein dekha

jhuka kar sar ye us ne kyun kaha allah hafiz hai

ilahi KHair ho kya hijr ke bimar mein dekha

wo mujh se puchhte hain kis mein dekha 'aib-e-KHud-bini

bura manenge manen keh to dun sarkar mein dekha

ye hi dekho ki us ko dekh kar kya meri haalat hai

'qamar' ye kuchh na puchho kya nigah-e-yar mein dekha