thi zarurat ishq ki wo sab ba-asani hua

thī zarūrat 'ishq kī vo sab ba-āsānī huā

jo huā jo bhī huā bharpūr shaitānī huā

us kashish meñ kyā nahīñ thā jo bhī thā bahtā gayā

vo badan merī tapish se sar-ba-sar paanī huā

vo jo thā paikar mire paikar pe ab vo hai vahāñ

kyā huā jo merā 'ishq ik dam se rūhānī huā

jam ke TuuTā hai lahū qalb-o-jigar kī baat kyā

kyuuñ na jaane terā mausam mujh meñ barfānī huā

aa ga.ī shab sahn meñ baiThe biThā.e ik kashish

maañd sabza mere ghar kā raat kī raanī huā

mere andar ho rahī thī ġham kī rim-jhim bin ruke

qatra qatra mil ke dekhā maiñ ne tuġhyānī huā

soch tak mahdūd kab thā mājrā is 'ishq kā

ek hī lamhe meñ sab kuchh kaif-e-nafsānī havā

harf jab had se baḌhe to she'r ḳhud hī ho gaye

merā chup rahnā bhī mere haq meñ nūrānī huā

ai ḳhudā kitnoñ ke dil meñ hai basā terā yaqīñ

kyā sitam hai tū bhī mujh meñ aa ke imkānī huā

thi zarurat 'ishq ki wo sab ba-asani hua

jo hua jo bhi hua bharpur shaitani hua

us kashish mein kya nahin tha jo bhi tha bahta gaya

wo badan meri tapish se sar-ba-sar pani hua

wo jo tha paikar mere paikar pe ab wo hai wahan

kya hua jo mera 'ishq ek dam se ruhani hua

jam ke TuTa hai lahu qalb-o-jigar ki baat kya

kyun na jaane tera mausam mujh mein barfani hua

aa gai shab sahn mein baiThe biThae ek kashish

mand sabza mere ghar ka raat ki rani hua

mere andar ho rahi thi gham ki rim-jhim bin ruke

qatra qatra mil ke dekha main ne tughyani hua

soch tak mahdud kab tha majra is 'ishq ka

ek hi lamhe mein sab kuchh kaif-e-nafsani hawa

harf jab had se baDhe to she'r KHud hi ho gaye

mera chup rahna bhi mere haq mein nurani hua

ai KHuda kitnon ke dil mein hai basa tera yaqin

kya sitam hai tu bhi mujh mein aa ke imkani hua