nai ghazal nae lahje ki aabru hum the

na.ī ġhazal na.e lahje kī aabrū ham the

vo ek daur thā mauzū'-e-guftugū ham the

kisī ne pichhle pahr niiñd se jagāyā hameñ

jo aañkh miich ke dekhā to hū-ba-hū ham the

tumhārī sham'-e-hidāyat to jal bujhī thī magar

tamām raat havāoñ ke rū-ba-rū ham the

taḌap rahe the jabīn-e-niyāz meñ sajde

magar vo paas se guzrā to be-vuzū ham the

koī nahīñ thā tumhāre sivā yahāñ 'ġhālib'

ye aur baat hai 'aḳhtar' kabhū kabhū ham the

nai ghazal nae lahje ki aabru hum the

wo ek daur tha mauzu'-e-guftugu hum the

kisi ne pichhle pahr nind se jagaya hamein

jo aankh mich ke dekha to hu-ba-hu hum the

tumhaari sham'-e-hidayat to jal bujhi thi magar

tamam raat hawaon ke ru-ba-ru hum the

taDap rahe the jabin-e-niyaz mein sajde

magar wo pas se guzra to be-wuzu hum the

koi nahin tha tumhaare siwa yahan 'ghaalib'

ye aur baat hai 'aKHtar' kabhu kabhu hum the