mujhe KHabar hai meri shan-e-justuju kya hai

mujhe ḳhabar hai mirī shān-e-justujū kyā hai

vo is liye ki maiñ ye jāntā huuñ tū kyā hai

ḳhudā pe terā ijāra nahīñ hai shaiḳh-e-haram

to phir batā ki ye andāz-e-guftugū kyā hai

nigāh-e-shauq ne sab kuchh batā diyā un ko

zabāñ ne laakh chhupāyā ki aarzū kyā hai

tujhī ko sauñp diyā hai tirī talāsh kā ġham

tū hī batā ki tirī rāh-e-justujū kyā hai

hazār shaiḳh-o-barahman fareb deñ lekin

maiñ jāntā huuñ ki maiñ kyā huuñ aur tū kyā hai

zamīr meñ jo ġhalāzat hai us ko dho.e shaiḳh

vagarna mujh ko batā maqsad-e-vuzū kyā hai

janāb-e-shaiḳh kī tauhīn ho jahāñ 'rāhī'

vahāñ batāo barahman kī aabrū kyā hai

mujhe KHabar hai meri shan-e-justuju kya hai

wo is liye ki main ye jaanta hun tu kya hai

KHuda pe tera ijara nahin hai shaiKH-e-haram

to phir bata ki ye andaz-e-guftugu kya hai

nigah-e-shauq ne sab kuchh bata diya un ko

zaban ne lakh chhupaya ki aarzu kya hai

tujhi ko saunp diya hai teri talash ka gham

tu hi bata ki teri rah-e-justuju kya hai

hazar shaiKH-o-barahman fareb den lekin

main jaanta hun ki main kya hun aur tu kya hai

zamir mein jo ghalazat hai us ko dhoe shaiKH

wagarna mujh ko bata maqsad-e-wuzu kya hai

janab-e-shaiKH ki tauhin ho jahan 'rahi'

wahan batao barahman ki aabru kya hai